Il-komitoloġija

Meta tapplika l-komitoloġija?

Il-komitoloġija tapplika meta l-Kummissjoni tkun ingħatat poteri ta’ implimentazzjoni fit-test ta’ liġi. L-istess liġi tistipola wkoll li l-Kummissjoni għandha tkun assistita minn kumitat meta jiġu definiti l-miżuri li jinsabu f’att ta’ implimentazzjoni li jirriżultaw minnha.

Il-komitoloġija mhix obbligatorja għall-atti ta' implimentazzjoni kollha – li xi wħud minnhom il-Kummissjoni tista’ tadotta mingħajr ma tikkonsulta kumitat (pereżempju, meta talloka għotjiet taħt ċertu ammont).

Atti ta' implimentazzjoni u delegati

Kif taħdem il-komitoloġija?

Meta l-Kummissjoni tadotta atti ta’ implimentazzjoni, tapplika 1 minn dawn il-proċeduri li ġejjin:

• proċedura ta' eżaminazzjoni – użata partikolarment għal (i) miżuri b'kamp ta' applikazzjoni ġenerali u (ii) miżuri b'impatt potenzjali importanti (eż. fit-tassazzjoni jew il-politika agrikola tal-UE)
• proċedura konsultattiva – użata ġeneralment għall-atti ta' implimentazzjoni l-oħrajn kollha.

Iż-żewġ proċeduri jirrikjedu li kumitat magħmul minn rappreżentanti mill-pajjiżi kollha tal-UE jipprovdu opinjoni formali, normalment fil-forma ta’ votazzjoni, dwar il-miżuri proposti tal-Kummissjoni.

Skont il-proċedura, opinjonijiet tal-kumitat jistgħu jorbtu legalment lill-Kummissjoni.

Proċedura ta’ eżaminazzjoni

• jekk maġġoranza kwalifikata (55% tal-pajjiżi tal-UE li jirrappreżentaw mill-inqas 65% tal-popolazzjoni totali tal-UE) tivvota favur il-proposta ta’ att ta’ implimentazzjoni, il-Kummissjoni trid tadottah
• jekk maġġoranza kwalifikata tivvota kontra l-att propost, il-Kummissjoni ma tistax tadottah
• Jekk ma jkun hemm ebda maġġoranza kwalifikata favur jew kontra l-att propost, il-Kummissjoni tista’ tadottah jew tissottometti verżjoni emendata ġdida.

Proċedura konsultattiva 

• il-Kummissjoni tiddeċiedi jekk tkomplix jew le bil-miżura proposta, iżda għandha "tagħti attenzjoni kbira" lill-opinjoni tal-kumitat qabel tiddeċiedi.

Kif jaħdmu l-kumitati?

Il-kumitati tal-komitoloġija huma stabbiliti minn leġiżlatur (il-Kunsill u l-Parlament Ewropew jew il-Kunsill waħdu). Dawn jinkludu rappreżentant wieħed minn kull pajjiż tal-UE u huma ppreseduti minn uffiċjal tal-Kummissjoni.

Kull kumitat jiddeċiedi l-proċeduri ta' ħidma tiegħu, abbażi tar-regoli standard ta' proċedura tal-kumitat.

Id-dipartimenti tal-Kummissjoni jissottomettu abbozz tal-miżuri ta’ implimentazzjoni lill-kumitati responsabbli għal opinjoni.

Il-biċċa l-kbira tal-kumitati jiltaqgħu diversi drabi fis-sena fil-bini tal-Kummissjoni (normalment fi Brussell).

Qabel kull laqgħa, il-Kummissjoni tibgħat l-invit, l-aġenda, u l-abbozz tal-att ta’ implimentazzjoni lill-awtoritajiet nazzjonali. Wara l-laqgħa, il-Kummissjoni tippubblika r-riżultati tal-votazzjoni u t-taqsira rreġistrata tal-laqgħa fir-reġistru tal-komitoloġija.

Il-Kummissjoni tippubblika rapport annwali dwar il-ħidma tal-kumitati tal-komitoloġija, li jagħti dettalji dwar l-attivitajiet tagħhom f’kull settur tal-politika.

Fittex għall-kumitati

Kumitat ta’ appell

Jekk il-Kummissjoni titwaqqaf milli tadotta att ta' implimentazzjoni li pproponiet (speċjalment meta l-kumitat ikun ivvota kontra), tista' tirreferi l-każ lill-kumitat tal-appell.

Il-kumitat tal-appell jaħdem b’mod simili ħafna tal-kumitati tal-komitoloġija l-oħrajn: huwa magħmul minn rappreżentanti tal-pajjiżi tal-UE, iżda fuq livell ogħla ta’ rappreżentazzjoni. Huwa ppresedut mill-Kummissjoni u jsegwi l-istess regoli ta’ votazzjoni.

Jagħti lill-pajjiżi tal-UE l-opportunità li jkollhom diskussjoni oħra.

Jekk il-kumitat tal-appell jiddeċiedi kontra l-att ta' implimentazzjoni propost mill-Kummissjoni, din għandha timxi fuq id-deċiżjoni tiegħu.

Ir-regoli ta' proċedura tal-kumitat tal-appell 

Skrutinju mill-Kunsill u l-Parlament tal-UE

Minbarra l-gvernijiet nazzjonali permezz tal-kumitati ta' komitoloġija, il-poteri ta' implimentazzjoni tal-Kummissjoni huma suġġetti wkoll għal verifiki addizzjonali mill-Parlament Ewropew u l-Kunsill tal-UE, li għandhom:

• dritt għall-informazzjoni – kull azzjoni proposta mill-Kummissjoni diskussa fil-kumitati tiġi żvelata lill-Parlament u lill-Kunsill fl-istess ħin.
• dritt ta’ skrutinju – meta azzjonijiet tal-Kummissjoni jkunu relatati ma’ att leġiżlattiv li jkun għadda mill-proċedura leġiżlattiva ordinarja, il-Parlament u/jew il-Kunsill jistgħu joġġezzjonaw kontra l-att ta’ implimentazzjoni propost jekk dan jaqbeż il-kompetenzi tal-Kummissjoni definiti fl-att inizjali. Il-Kummissjoni mbagħad tiġi obbligata tirrevedi l-att propost tagħha fid-dawl ta' dan il-kontribut u tiddeċiedi żżommux, temendahx jew tirtirahx.

Reġistru tal-Komitoloġija

Ir-reġistru tal-komitoloġija fih lista tal-kumitati kollha tal-komitoloġija, kif ukoll informazzjoni ta' sfond u dokumenti relatati mal-ħidma ta' kull kumitat.